23 април е избран од УНЕСКО како ден кога се слават писателите и нивните дела. Идејата за празникот потекнува од Каталонија, каде на овој ден традиционално се подарува роза за секоја купена книга. Во Македонија веќе 12 години се празнува денот на книгата и авторското право.

23 Април е избран затоа што на тој ден во 1616 година починале Мигел де Сервантес и Вилијам Шекспир.

Библиотеката „Гоце Делчев од Гевгелија се вклучува во одбележувањето на овој ден со повеќе активности, а завршната манифестација ќе биде одржана на 23 април 2010 година во хотелот „Нар“ во Гевгелија со почеток во 20,00 часот.

Библиотеката објавува конкурс за есеј на тема

Книгата и нејзината вистина

                - Есејот да не биде подолг од две страници, пишуван во Word со кирилични букви (големина на букви 12);

- Конкурсот е анонимен;

- Есеите пишувани со шифра, напечатени на ЦД во 1 примерок и на хартија во формат А4 во 4 примерока, заедно со затврен плик со лични податоци за идентификација на авторот да се стават во плик и да се испратат на адреса:

Библиотека „Гоце Делчев“

(За конкурсот за есеј)

Ул. „Васо Карајанов“ 1

Гевгелија

Конкурсот е отворен до 15 април 2010 год.

Авторството ќе биде докажувано со петтиот примерок од есејот кога ќе биде отворен и пликот со личните податоци за идентификација на авторот.

Во Библиотеката од Гевгелија во моментот набавени се 270 наслови од едицијата книги што Владата на Република Македонија ги реализира преку проектот „Превод на 500 книги од најреномираните универзитети во САД и Англија“. Книгите се од областа на правото и економијата во Франција и Германија и достапни се за сите корисници.

Со цел да ги запознае читателите и корисниците со библиотечниот материјал, да ја популаризира книгата, но и создаде навика за читање и користење на книгата, Библиотеката од Гевгелија запиша 56 ученика од второ одделение од основите училишта „Крсте Мисирков“ и „Владо Кантарџиев“. Членските карти учениците свечено ќе ги добијат во текот на идната недела.

На 04.03.2010 во хотел „Нар“ се одржа 12 Поетско-музичка вечер „За тебе љубов моја“. Во организација на Библиотеката од Гевгелија и ЗГ „Дон Кихот“ пред многубројната публика и оваа година беа презентирани стихови и песни од роднокрајни автори. На манифестацијата беа доделени и наградите од литературниот конкурс што го распиша Библиотеката . Првото место му припадна на Стефан Марковски за поетската творба „Раѓање на насмевката“. Инаку манифестацијата годинава имаше видоизменет карактер. Беа претставени четири поети од Гевгелија со нивното творештво, а преку видео филмови беше прикажана влијателноста на жената и нејзината улога низ историјата. Единствениот проблем со кој се соочи организаторот беше просторот, којшто беше премал за да ја собере целата публика.

Повеќе за манифестацијата може да најдете на оваа страница во делот За тебе љубов моја.

Во Библиотеката во Гевгелија е отворен зимскиот Саем на книгата кој ќе трае до 27 февруари. Саемот за отворен го прогласи директорот на Библиотеката Тони Аврамов пред многубројните граѓани и ученици од Гевгелија. Инаку ова е петти саем што го организира Библиотеката од Гевгелија и има за цел да ја популаризира книгата. Саемот ќе биде отворен секој работен ден од 11 до 17 часот.