На 47 Седница на Советот на Општина Гевгелија се разгледуваше и се усвои извештајот за работењето на ЈОУ-Библиотека Гоце Делчев за 2007 година. Извештајот според советниците е најдобро изработен извештај што досега го подгототвила некоја јавна институција.

„Ако некој од нас советниците сака да дискутира нешто околу извештајот на ЈОУ-Библиотека „Гоце Делчев“, верувам дека ќе направи огромна грешка бидејќи до сега, во сите овие години поминати во Советот на општината, немам добиено подобар извештај, поконкретно направен, посодржаен, односно извештај во кој буквално е сè опфатено. Затоа предлагам да донесеме заклучок, да им укажеме на сите јавни општински установи кои работат во составот на Општина Гевгелија да видат како се прави еден извештај за работењето за една тековна година.

Сите тие што не знаат како треба да го прават, нека одат малку на едукација кај раководното лице на Библиотеката.

Јас, целосно стојам зад Извештајот, го подржувам и ги поздравувам напорите на раководното лице за квалитетен и најдобро досега направен извештај за работењето на некоја јавна институција“.

Венчо Атанасов-советник

„Во извештајот е дадена целосна информација за она што биле реализирани активности на Библиотеката во 2007 година. Сите активности се многу содржајно и јасно искажани, со конкретно обработени и дефинирани реализирани проекти“.

Марика Ризова-советник

„Честитки за изготвувачот на Извештајот, а посебно за делот каде на транспарентен начин се дадени податоците за реализираните активности и целосниот приказ на истите.
Изготвувачот имал доблест да покаже што значи транспарентност во работењето“.

Панде Кацарски- претседател на Советот на Општина Гевгелија

Библиотеката од Гевгелија за празниците изготви честитка за коминтентите и корисниците, со цел популаризација на кампањата која ќе се одвива во 2008 година.

„Моја песна, омилен рефрен“ е заштитниот наслов под кој ќе се одржуваат сите настани и манифестации што ќе ги организира Библиотеката.

За оваа цел е компонирана песна од композиторот и аранжер Игор Узунов, а текстот го напиша Тони Аврамов. Придружните вокали беа доверени на Марија Каркалашева и Христина Пелева.

Моја песна, омилен рефрен

Имам бакнежи за да те чувам
твои богатства и векови да будам,
имам прегратки за да те скријам
радост, солзи за тебе да лијам.

Имам ноти со нив да ти пеам
во тивки ноќи срце да ти греам,
имам душа ко море длабока
во твои зори ко небо висока.

Ти си изгрев во секој нов ден,
ти си песна, омилен рефрен,
ти си извор, вечна инспирација,
ти си моја фантазија…

Пуштам поглед со тебе да бидам
сè што сакам во тебе да видам,
пуштам раце в дланки да те имам
судбини ко гатач да ти откривам.

Милион години во тебе се кријат,
стари тајни во твои очи спијат,
твоите зборој се моја станица,
искрена љубов, чиста страница.

На денот на ослободувањето на Гевгелија, 7 ноември, се одржа завршната манифестација по повод Месец на книгата. На распишаниот конкурс за литературни творби што го објави Библиотеката пристигнаа 58 творби од ученици од основните училишта и од СОУ „Јосиф Јосифовски“ од Гевгелија.

Наградени ученици од основните општински училишта:

Прво место: Љубица Делиманова, ОУ „Владо Кантарџиев“ - Гевгелија

Второ место: Ристо Јованов, ОУ „Крсте Мисирков“ - Гевгелија

Трето место: Ангела Зумровска, ОУ „Климент Охридски“-Миравци

Наградени ученици од СОУ „Јосиф Јосифовски“:
Алиевиќ Стефан, Џакова Марија, Даниел Савревски

Во организација на ЈОУ-Библиотека „Гоце Делчев“–Гевгелија и локалната канцеларијата на УНДП на 5 ноември во просториите на библиотеката отворија изложба на пристигнатите проекти за идејно архитектонско решение за нов мултифункционален граѓански центар-библиотека во Гевгелија.

Студентите на Архитектонскиот факултет од Скопје, Корнелија Јанева, Билјана Тасева и Стојче Димитриевски победија на конкурсот за идејно архитектонско решение за нов мултифункционален граѓански центар-библиотека во Гевгелија. Во конкуренција на седум индивидуални и колективни тимови архитекти, од кои по еден од САД и од Германија, тие ја освоија првата награда на меѓународниот конкурс кој се реализираше во соработка со локалната канцеларија на УНДП и Општина Гевгелија во рамките на програмата „Локално управување за одржлив човечки и економски развој“ финансиран од владата на Финска.

Генерирањето на формата на објектот, што го понудија првонаградените, е произлезено од урбаното ткиво во кое е сместен објектот, кое всушност претставува автентична геометриска композиција од призми со различна форма и големина. Објектот одразува две спротивставени димензии, монументалност симболизирана преку неговата обликовност и едновремено интимност и човекомерност присутни во организацијата на внатрешниот простор.

Архитектурата на проектот е инспирирана од примери на финската архитектура која како референца е посочена на проектните барања на конкурсната задача.

Објектот треба да има 2000 квадратни метри функционален простор и да содржи детска читална, детски оддел за читање на бајки, за одржување на претстави, работилници за деца, потоа отворена галерија за читатели, информативен центар, оддел за музика и филм, комуникациско јадро, административен, магацински простор.

Внатрешниот дел од објектот има можност за просторна организација. Така на пример, таканаречениот мултифункционален простор се користи за повеќе намени, меѓу кои претежно како читална. Магацинскиот простор е решен како двовисински, со цел да го задоволи потребниот капацитет на книги.

Дипломците, првонаградените го објаснуваат проектот како едноставно, смирено тело што не се наметнува на околината, останува неговата реализација со цел не само да се решат проблемите на библиотеката од Гевгелија, туку граѓаните да добијат свое омилено место за следење на културните настани.

Идејното решение кое добиено преку овој конкурс, ќе биде појдовна основа во изградбата на новиот Мултифункционален граѓански центар, во чии рамки би функционирала и новата библиотека. Идејното решение за нова библиотека е резултат на подолгорочна работа и истражување во рамките на кнцеларијата на УНДП. Најпрво беше формирана работна група која ги анализираше и детектираше проблемите во оваа сфера, кои се потребите на граѓаните и каква библиотека би сакале во иднина да имаат согласно стандардите на новото време. Во креирањето на новиот модел на библиотека беа користени фински искуства, како земја која има високо-развиени стандарди на светско ниво во оваа сфера.

На 16 октомври, денот на трагичното загинување на нашиот Тоше, Библиотеката отвори книга на жалоста.

***

Само едно знам… никогаш и никаде, не мислеле сите исто, не сакале сите подеднакво, не почитувале сите толку многу и не плачеле сите во еден глас… никогаш и никаде немало толку болка кај сите… толку силна дури неподнослива.

За тебе, сите исто плачеа, сите исто те сакаа, подеднакво те почитуваа, за Тебе Тоше болката до небото и отаде стигнува…

Сонцето не загинува кога заоѓа.

***

Кога животот не би бил толку суров-немаше да биде болката толку голема колку што е сега.

Кога би ја немало болката-немаше да знаеме за љубовта.

Кога би ја немало љубовта-немаше да бидеме живи.

Сега,

Животот за нас е суров,

Болката е многу голема, но ќе ја снема,

А тогаш ќе ја нема ни љубовта-

Затоа што без Тебе Тоше – ние ко да не сме живи!

***

Имам ли уште радост

Тага да измијам

Во туѓи стихови тажни

Тебе да те пронајдам

Имам ли очи да видам

Ил тивко да заспијам

Кога веќе не си тука

Јас да умирам.